ഇന്നത്തെ മത്സരം!

മത്സരം മത്സരം സര്‍വത്ര മത്സരം
എന്തിനും ഏതിനും അനുദിനം മത്സരം

തല്ലലും കൊല്ലലും തല്ലിപ്പൊളിക്കലും
തള്ളിപ്പറയലും ഇന്നൊരു മത്സരം

വെട്ടിപ്പിടിക്കലും വെട്ടിനിരത്തലും
കട്ടുമുടിക്കലും മറ്റൊരു മത്സരം

മുണ്ടുരിഞ്ഞോടലും കൈവെട്ടിയോടലും
ക്വട്ടേഷന്‍ നല്‍കലും വേറിട്ടൊരു മത്സരം

കൈക്കൂലി വാങ്ങലും കാല്‍പൂജ ചെയ്യലും
കണ്ണടച്ചീടലും ഒരുതരം മത്സരം

ഹര്‍ത്താലാഘോഷിക്കലും പണിമുടക്കീടലും
തീവ്രവാദങ്ങളും പിന്നെയൊരു മത്സരം

പെണ്ണുകെട്ടീടലും പോന്നുമേടിക്കലും
പെണ്ണിനെ തഴയലും വേറൊരു മത്സരം

സദ്യയൊരുക്കലും മദ്യം വിളമ്പലും
ധൂര്‍ത്തടിച്ചീടലും ഇനിയുമൊരു മത്സരം

എന്തിനും ഏതിനും മത്സരിച്ചീടുന്ന
മര്‍ത്യരോടൊരു വാക്ക് ചൊല്ലീടുവാന്‍ മോഹം

നന്മ ചെയ്തീടാനും നന്ദിയേകീടാനും
മത്സരിച്ചന്യര്‍ക്കായ് മാതൃകയേകിടാം

പോള്‍സണ്‍ പാവറട്ടി