ആനപ്പുറത്തിരിക്കുന്ന പാപ്പാനും താഴെയുള്ള പട്ടിയും.
*************************************************************
"ആനപ്പുറത്തിരിക്കുന്ന പാപ്പാന് താഴെ നില്‍ക്കുന്ന പട്ടിയെ പേടിക്കേണ്ടതില്ല" എന്നൊരു ചൊല്ലുണ്ട്. എല്ലായ്പ്പോഴും അത് ശരിയായിക്കൊള്ളണമെന്നുണ്ടോ? നമുക്കുനോക്കാം.
ബിജുവിന്റെ വീടിന്റെ മുന്നിലുള്ള റോഡിലൂടെ ഒരു ആന നടന്നു പോകുന്നുണ്ടായിരുന്നു. ആനയെ കണ്ടപ്പോള്‍ റോഡരികില്‍ തന്റെ പറമ്പില്‍ നിന്നുകൊണ്ട് ബിജുവിന്റെ പട്ടി കുരക്കാന്‍ തുടങ്ങി. കുരക്കുന്ന പട്ടിയെ കണ്ടപ്പോള്‍ ആനപ്പുറത്തിരിക്കുന്ന പാപ്പാന് മുകളില്‍ പറഞ്ഞ ചൊല്ല് ഓര്‍മ്മ വന്നു, "ആനപ്പുറത്തിരിക്കുന്ന പാപ്പാന് താഴെ നില്‍ക്കുന്ന പട്ടിയെ പേടിക്കേണ്ടതില്ല". പാപ്പാന് ഒരു രസത്തിന് താഴെ നിന്ന് കുരക്കുന്ന പട്ടിയെ പ്രകോപിപ്പിക്കാന്‍ തുടങ്ങി. തന്റെ കൈയ്യില്‍ ഇരിക്കുന്ന തോട്ടികൊണ്ട്‌ താഴെ നില്‍ക്കുന്ന പട്ടിക്ക് ഒരു കുത്ത് കൊടുത്തു. വേദനകൊണ്ട് പട്ടി മോങ്ങിക്കൊണ്ട് ഓടിപ്പോയി.
കുറച്ചുനാള്‍ കഴിഞ്ഞപ്പോള്‍ ബിജു തന്റെ വീടും പറമ്പും എല്ലാം വിറ്റ് മറ്റൊരിടത്ത് താമസമാക്കി. പട്ടിയേയും കൂടെ കൊണ്ടുപോകും എന്ന് പറയേണ്ടതില്ലല്ലോ.
ഒരു ദിവസം വീണ്ടും അതാ പണ്ടത്തെ ആനയും പാപ്പാനും ആ വഴി വരുന്നു. ബിജുവിന്റെ പട്ടി ആനയെ കണ്ടതോടെ കുരക്കാന്‍ തുടങ്ങി. ഇത്തവണ കുരക്കുന്ന പട്ടിയെ കണ്ടപ്പോള്‍ പാപ്പാന് മുകളില്‍ പറഞ്ഞ ചൊല്ല് ശരിയല്ല എന്ന് തോന്നാന്‍ തുടങ്ങുകയും പേടിച്ച് വിറച്ച് ഇരിക്കാനും തുടങ്ങി. കാരണം എന്താണെന്നല്ലേ, ഇപ്പോള്‍ ആന നടന്നു പോകുന്നത് ഒരു താഴ്ന്ന പ്രദേശത്തുകൂടിയാണ്. പട്ടി നില്‍ക്കുന്നതോ ആനയോളം ഉയരമുള്ള പറമ്പിലും. ഈ സമയം പപ്പാന്‍ പണ്ടത്തെപ്പോലെ പട്ടിയെ പ്രകോപിപ്പിക്കാന്‍ തുടങ്ങിയാല്‍ എന്താകും അവസ്ഥ എന്ന് പറയേണ്ടതില്ലല്ലോ? ഒറ്റച്ചാട്ടത്തിന് പാപ്പാന്റെ കഴുത്തില്‍ പിടിക്കും. ശരിയല്ലേ?
സ്നേഹിതരേ, ഈ കൊച്ചു കഥയില്‍ ഒരു സന്ദേശം ഒളിഞ്ഞിരിക്കുന്നുണ്ട്. പണത്തിന്റേയും പ്രതാപത്തിന്റേയും "ആനപ്പുറത്ത്" ഇരിക്കുന്നവര്‍ക്ക് ഒരു തോന്നല്‍ ഉണ്ടാവാം, താന്‍ "ആനപ്പുറത്ത്" ഇരിക്കുന്നതുകൊണ്ട്‌ ആരേയും പേടിക്കേണ്ടതില്ല, ബഹുമാനിക്കേണ്ടതില്ല എന്നൊക്കെ. എന്നാല്‍ ഒന്നോര്‍ക്കണം, ഇന്നല്ലെങ്കില്‍ നാളെ താന്‍ ഇരിക്കുന്ന "ആന" താഴ്ന്ന പ്രദേശത്തുകൂടി നടക്കാന്‍ ഇടവന്നേക്കാം. അന്നേരം മുന്‍പ് തന്നേക്കാള്‍ താഴെ ആയിരുന്നവര്‍ പലരും തന്നേക്കാള്‍ ഉയരത്തിലായിരിക്കും.
എന്നും എല്ലാവരും ഒരേ അവസ്ഥയില്‍ ആയിരിക്കില്ല. ഈയൊരു ചിന്ത എല്ലാവര്‍ക്കും ഉണ്ടായിരുന്നെങ്കില്‍ ഈ ലോകം എത്ര സുന്ദരമായേനെ, അല്ലെ?
എല്ലാവര്‍ക്കും നന്മകള്‍ നേരുന്നു.
പോള്‍സണ്‍ പാവറട്ടി
00971 50 5490334
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ