ക്ഷമിക്കുന്ന സ്നേഹം!
***************************
ദുബായിലെ ഒരു കമ്പനിയുടെ നേടുംതൂണാണ് ബിനോയ്‌. പറയത്തക്ക വലിയ വിദ്യാഭ്യാസ യോഗ്യതയോന്നുമില്ലെങ്കിലും ആ കമ്പനിയിലെ ഏതൊരു കാര്യവും ബിനോയ്‌ മുഖേനയല്ലാതെ നടക്കില്ല. ബിനോയിയേക്കാള്‍ പഠിപ്പും വിവരവും ഉള്ളവര്‍ പലരും കമ്പനിയില്‍ ഉണ്ടെങ്കിലും കാര്യം നടക്കണമെങ്കില്‍ ഒടുവില്‍ ബിനോയ്‌ തന്നെ വേണം "യെസ്" പറയാന്‍. ചുരുക്കത്തില്‍ ബിനോയ്‌ ഇല്ലെങ്കില്‍ കമ്പനി ഇല്ല. ഇതാണ് അവസ്ഥ.ഒരിക്കല്‍ മാനേജ്‌മന്റ്‌ ഒരു തൊഴിലാളിയെ പിരിച്ചുവിടാന്‍ തീരുമാനിച്ചു. ആ തൊഴിലാളിയുടെ തെറ്റുകൊണ്ടുതന്നെയാണ് അങ്ങനെ സംഭവിച്ചത് എന്ന് പറയാതിരിക്കാന്‍ നിവൃത്തിയില്ല. മാനേജ്‌മന്റ്‌ ഇക്കാര്യം ബിനോയിയോട് സംസാരിച്ചു. ആ തൊഴിലാളിയുടെ വീട്ടിലെ അവസ്ഥ ബിനോയിക്ക് നല്ലതുപോലെ അറിയാവുന്നതുകൊണ്ട്‌ ആ തൊഴിലാളിയെ പിരിച്ചുവിടാതെ തല്‍ക്കാലം ഒരു വാണിംഗ് ലെറ്റര്‍ കൊടുത്താല്‍ പോരേ എന്ന് ബിനോയ്‌ ചോദിച്ചു. പക്ഷേ മാനേജ്‌മന്റ്‌ അതിനു തയ്യാറില്ലായിരുന്നു.
ബിനോയിയുടെ വാക്ക് അവര്‍ കേള്‍ക്കുന്നില്ല എന്ന് മനസ്സിലാക്കിയപ്പോള്‍ ബിനോയ്‌ പറഞ്ഞു: അങ്ങനെയാണെങ്കില്‍ എന്നേയുംകൂടി ഒഴിവാക്കിയേക്കൂ. മനുഷ്യത്വപരമായി അദ്ദേഹത്തോട് നിങ്ങള്‍ക്ക് സമീപിക്കാന്‍ കഴിയില്ലെങ്കില്‍ ഈ കമ്പനിയില്‍ ജോലിയില്‍ തുടരാന്‍ ഞാന്‍ ആഗ്രഹിക്കുന്നില്ല.
മാനേജ്‌മന്റ്‌ ബിനോയിയില്‍ നിന്നും ഈ പ്രതികരണം ഒരിക്കലും പ്രതീക്ഷിച്ചില്ല. "മധുരിച്ചിട്ട് തുപ്പാനും വയ്യ, കയ്ച്ചിട്ട് ഇറക്കാനും വയ്യ" എന്നു പറഞ്ഞതുപോലെയായി മാനേജ്‌മന്റ്‌. ഒടുവില്‍ ബിനോയിയുടെ വാക്ക് അവര്‍ എടുക്കാന്‍ തീരുമാനിച്ചു. അങ്ങനെ ആ തൊഴിലാളി തല്‍ക്കാലം രക്ഷപ്പെട്ടു.
ബിനോയ്‌ ആ തൊഴിലാളിക്കുവേണ്ടി സംസാരിച്ച കാര്യമെല്ലാം മാനേജ്‌മന്റ്‌ ആ തൊഴിലാളിയെ അറിയിച്ചു. ഒരുതരത്തില്‍ ബിനോയിയുടെ ദാനമാണ് തന്റെ ഇപ്പോഴത്തെ ജോലി എന്നും പറഞ്ഞു മനസ്സിലാക്കി കൊടുത്തു. അപ്പോഴാണ്‌ അദ്ദേഹത്തിന്റെ കണ്ണ് തുറന്നത്. ചെയ്തുപോയ തെറ്റുകള്‍ പൊറുക്കണമെന്നും മേലില്‍ ഇത്തരം തെറ്റുകള്‍ ആവര്‍ത്തിക്കില്ലെന്നും അദ്ദേഹം മാനേജ്‌മന്റ്‌നോട് സത്യം ചെയ്തു.
തുടര്‍ന്ന് ആ കമ്പനിയിലെ ഏറ്റവും മിടുക്കനായ ഒരു തൊഴിലാളിയായി മാറി അദ്ദേഹം.
ഏതു ക്രിമിനലിനേയും സ്നേഹംകൊണ്ട് തിരുത്താം എന്ന ഒരു സന്ദേശമാണ് ബിനോയ്‌ നമുക്ക് ഇവിടെ നല്‍കുന്നത്.
പോള്‍സണ്‍ പാവറട്ടി
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ