മനുഷ്യനിലെ പന്നി സ്വഭാവം!
************************************
ബുദ്ധിയും വിവേകവും ഉള്ള ഒരു മനുഷ്യന് സ്വര്‍ണ്ണവും രത്നവും വൈഡൂര്യവും എല്ലാം വിലമതിക്കുന്നതുതന്നെ, സംശയമില്ല. എന്നാല്‍ ഇതേ വിലമതിക്കുന്ന വസ്തുക്കള്‍ ഒരു പന്നിയുടെ മുന്നില്‍ ഇട്ടുകൊടുത്തു നോക്കൂ. പന്നിക്കുണ്ടോ ഇവയുടെ മൂല്യം അറിയുന്നു? അതേസമയം ഒരു കുട്ട നിറയെ അമേദ്യം അഥവാ വിസര്‍ജ്യം പന്നിയുടെ മുന്നില്‍ വെച്ചുകൊടുത്തു നോക്കൂ. ആ പന്നി സന്തോഷംകൊണ്ട് മതിമറക്കുകയും അതില്‍ കിടന്നു ഉരുണ്ടു മറിയുകയും ചെയ്യും. ആര്‍ക്കെങ്കിലും സംശയം ഉണ്ടെങ്കില്‍ ഒന്ന് പരീക്ഷിച്ചു നോക്കിക്കോളൂ.
ചില മനുഷ്യരും ഇതേ പന്നിയെപ്പോലെയാണ്. അന്യരിലെ നന്മയെ കാണാതെ കുറ്റവും കുറവും മാത്രം ചികഞ്ഞു കണ്ടുപിടിക്കുകയും അത് മറ്റുള്ളവരെ അറിയിച്ച് അതില്‍ സന്തോഷവും ആനന്ദവും കാണുന്നവരാണ്. ഇത് ഒരുതരം മനോവൈകല്യമാണെന്നാണ് മനശാസ്ത്രം പറയുന്നത്. അന്യരെ വിമര്‍ശിക്കുന്നവനും വിമര്‍ശിക്കപ്പെടുന്നവനെപ്പോലെ കുറ്റങ്ങളും കുറവുകളും ഒട്ടും കുറയാതെയുള്ളവനാണ് എന്ന വസ്തുത സൌകര്യപൂര്‍വ്വം മറക്കുന്നു അല്ലെങ്കില്‍ മറച്ചുവക്കുന്നു. അതല്ലേ സത്യം?
ഈ അടുത്ത കാലത്തായി ഫേസ് ബുക്കിലും മറ്റു സോഷ്യല്‍ നെറ്റ് വര്‍ക്ക്‌ - കളിലും നിരന്തരം കണ്ടുവരുന്ന ഒരു പ്രവണതയാണ് മറ്റുള്ളവരെക്കുറിച്ചുള്ള കുറ്റം പറച്ചില്‍. പ്രിഥ്വിരാജ്, ശ്രീശാന്ത്‌, സന്തോഷ്‌ പണ്ഡിറ്റ്‌ ... തുടങ്ങി പലരെക്കുറിച്ചും കണ്ടു ഈ കുറ്റം പറച്ചിലുകള്‍. അവരെ പരിഹസിച്ചതുകൊണ്ടോ കളിയാക്കിയതുകൊണ്ടോ കുറ്റം പറഞ്ഞതുകൊണ്ടോ അവര്‍ക്കൊന്നും പ്രത്യേകിച്ച് ദോഷം സംഭവിച്ചില്ല എന്ന വസ്തുതയും കൂടി അറിഞ്ഞാല്‍ നന്നായിരിക്കും. സന്തോഷ്‌ പണ്ഡിറ്റ്‌ ആണെങ്കില്‍ കൂടുതല്‍ പ്രശസ്തനാവുകയും ചെയ്തു. (ഈ കുറ്റം പറച്ചില്‍ കൊണ്ട് അങ്ങനെയെങ്കിലും ഒരു ഗുണം ഒരാള്‍ക്കെങ്കിലും ഉണ്ടായി എന്ന കാര്യത്തില്‍ ഇക്കൂട്ടര്‍ക്ക് സന്തോഷിക്കാം, സമാധാനിക്കാം).
സ്നേഹിതരേ, ഇനിയെങ്കിലും മറ്റുള്ളവരുടെ കുറ്റങ്ങളും കുറവുകളും ചികഞ്ഞു കണ്ടുപിടിച്ച് അവരെ സമൂഹമധ്യത്തില്‍ അവഹേളിക്കാതെ അവരിലെ നന്മ, അത് എത്ര ചെറുതാണെങ്കിലും അത് കണ്ടുപിടിച്ച് അതിനെ പ്രോത്സാഹിപ്പിക്കാന്‍ ശ്രമിക്കാം. അങ്ങനെ നമ്മളിലെ പന്നിയുടെ സ്വഭാവത്തെ ഉന്മൂലനം ചെയ്യാം.
ഏവര്‍ക്കും നന്മ നേരുന്നു.
പോള്‍സണ്‍ പാവറട്ടി - ദുബായ്
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ