ടീന ടോംസ് എന്ന മാലാഖ
********************************
ഗള്‍ഫിലെ ഒരു ആസ്പത്രിയില്‍ കാര്‍ഡിയോളജി വിഭാഗത്തില്‍ സേവനം ചെയ്യുന്ന ഒരു നേഴ്സ് ആണ് ടീന ടോംസ്. ഹൃദയ സംബന്ധമായ രോഗവുമായി, തകര്‍ന്ന മനസ്സുമായി വരുന്ന രോഗികളെ ഹൃദയപൂര്‍വ്വം സ്നേഹിക്കുകയും പരിചരിക്കുകയും ചെയ്യുമ്പോള്‍ ഓരോ രോഗിയും ആ നേഴ്സ്നെ സ്വന്തം സഹോദരിയെപ്പോലെ സ്നേഹിക്കുന്നു. അത്രമാത്രം ആത്മബന്ധം രോഗികളുമായി ഉണ്ടാക്കിയെടുക്കാന്‍ ആ നേഴ്സ് എപ്പോഴും ശ്രമിക്കാറുണ്ട്. രോഗികളെ ശുശ്രൂഷിക്കുന്നതിനിടയില്‍ നേരിയ സ്വരത്തില്‍ പാട്ട് പാടുക ടീനയുടെ പതിവാണ്. സ്വരമാധുരിയോടെയുള്ള ടീനയുടെ പാട്ട് കേള്‍ക്കുമ്പോള്‍ പല രോഗികളും തന്റെ വേദന മറന്ന് ഒരിക്കല്‍ക്കൂടി ആ പാട്ട് പാടാമോ സിസ്റ്റര്‍ എന്ന് ടീനയോട് ചോദിക്കാറുണ്ട്. ടീന അവരുടെ സന്തോഷത്തിനു വേണ്ടി വീണ്ടും പാടും. പാട്ടുപാടുന്ന ടീനയുടെ സാമിപ്യം പല രോഗികളും ഇഷ്ടപ്പെടുന്നു എന്ന് എല്ലാവര്‍ക്കും മനസ്സിലായി. മാത്രമല്ല, പല രോഗികള്‍ക്കും പെട്ടെന്ന് രോഗം ഭേദമാവുന്നതും കാണാന്‍ തുടങ്ങി. അവര്‍ പറയും ടീന ടോംസ് ഒരു മാലാഖയാണ്.
ഒരിക്കല്‍ ആസ്പത്രിയുടെ ഡയറക്ടര്‍ സാര്‍ ഹൃദയസംബന്ധമായ രോഗവുമായി ആ ആസ്പത്രിയില്‍ പ്രവേശിക്കപ്പെട്ടു. അദ്ദേഹം ഡയറക്ടര്‍ ആണെന്ന് ടീനയ്ക്ക് അറിയില്ലായിരുന്നു. ടീന പതിവുപോലെ രോഗിയായ ഡയറക്ടര്‍ സാറിന്റെ അടുത്തും പാട്ടുപാടി പരിചരിക്കാന്‍ തുടങ്ങി. ടീനയുടെ പാട്ടുപാടി, സ്നേഹത്തോടെയുള്ള പരിചരണം ഡയറക്ടര്‍ സാറിന് വളരെ ഇഷ്ടപ്പെട്ടു. അദ്ദേഹം ടീനയെക്കുറിച്ച് കൂടുതല്‍ വിവരങ്ങള്‍ ചോദിച്ചറിഞ്ഞു. ടീനയുടെ വിനയവും ദൈവവിശ്വാസവും മനുഷ്യത്വപരമായ സമീപനവും സര്‍വ്വോപരി പാട്ടുപാടി രോഗികളെ പരിച്ചരിക്കുന്നതും എല്ലാം എല്ലാം ഡയറക്ടര്‍ സാറിന് ഒത്തിരി ഇഷ്ടമായി.
ഡയറക്ടര്‍ സാര്‍ രോഗം ഭേദമായി പുറത്തു വന്നതിനു ശേഷം ആദ്യം ചെയ്തത് എങ്ങനെ മ്യൂസിക്‌ തെറാപ്പി തന്റെ ആസ്പത്രിയില്‍ തുടങ്ങാം എന്ന അന്വേഷണമാണ്. അധികം താമസിയാതെ തന്റെ ആസ്പത്രിയില്‍ മ്യൂസിക്‌ തെറാപ്പി ആരംഭിച്ചു. ടീനയെ അതിന്റെ ചാര്‍ജ് ഏല്‍പ്പിക്കുകയും ചെയ്തു. അപ്പോള്‍ മാത്രമാണ് ടീന അറിയുന്നത് മുന്‍പ് അവിടെ കിടന്നിരുന്ന രോഗി ഡയറക്ടര്‍ സാര്‍ ആയിരുന്നു എന്ന്.
അങ്ങനെ നമ്മുടെ നായിക ടീന ടോംസ് എന്ന മാലാഖ ഇന്ന് മ്യൂസിക്‌ തെറാപ്പിയില്‍ പുതിയ പരീക്ഷണങ്ങള്‍ നടത്തി അതിവേഗം ബഹുദൂരം മുന്നോട്ട് പോയ്ക്കൊണ്ടിരിക്കുകയാണ്.
ടീന ടോംസ്ന് എല്ലാവിധ ഭാവുകങ്ങളും നേര്‍ന്നുകൊള്ളുന്നു.
പോള്‍സണ്‍ പാവറട്ടി
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ