സ്നേഹത്തിനു പ്രതിഫലം കുരിശ്
****************************************
പുറമേയ്ക്ക് ഒരു പരുക്കന് സ്വഭാവം ഉള്ളവന് എന്ന് തോന്നിക്കുമെങ്കിലും ഡെന്നീസ് ആളൊരു ശുദ്ധനാണ്. ചെയ്യുന്ന ജോലിയില് നൂറല്ല നൂറ്റൊന്നു ശതമാനം ആത്മാര്ത്ഥത കാണിക്കുന്നതാണ് അദ്ദേഹത്തിന്റെ ബലഹീനത. തന്നെ ഏല്പ്പിച്ച ജോലി എത്ര ഭാരമുള്ളതാണെങ്കിലും ബുദ്ധിമുട്ടുള്ളതാണെങ്കിലും യാതൊരു പരാതിയും ഇല്ലാതെ വളരെ ഭംഗിയായിതന്നെ എല്ലാം ചെയ്തുതീര്ക്കും. പലപ്പോഴും സ്വന്തം ആരോഗ്യവും രോഗവുംപോലും വകവെക്കാതെ ജോലി ചെയ്യുമ്പോള് സഹപ്രവര്ത്തകര് പോലും അദ്ദേഹത്തെ നിരുത്സാഹപ്പെടുത്താന് ശ്രമിക്കാറുണ്ട്. പക്ഷേ, ഡെന്നീസ് അതൊന്നും കാര്യമാക്കാറില്ല. താന് കാരണം തന്റെ ബോസിന് യാതൊരു നഷ്ടവും വരരുത് എന്നാണ് അദ്ദേഹത്തിന്റെ ഭാഷ്യം.
മറ്റുള്ളവര്ക്ക് ജോലി തരപ്പെടുത്തിക്കൊടുക്കുക എന്നതാണ് അദ്ദേഹത്തിന്റെ അടുത്ത ബലഹീനത. "ബലഹീനത" എന്ന് പറയുന്നതിന് കാരണമുണ്ട്, ഊരും പേരും ഒന്നും അറിയാത്തവരെ തന്റെ സ്വന്തക്കാരനാണ് ബന്ധക്കാരനാണ് എന്നൊക്കെ പറഞ്ഞാണ് പലയിടത്തും ജോലിയില് പ്രവേശിപ്പിക്കുന്നത്. എന്നാല് ഇങ്ങനെ ജോലി നേടിയവരാകട്ടെ, കാര്യം കഴിയുമ്പോള് ഡെന്നീസ് എന്ന സഹായിയെ മറക്കുന്നു എന്നതോ പോകട്ടെ, അവര് ആ സ്ഥാപനത്തില് കാട്ടിക്കൂട്ടുന്ന പ്രശ്നങ്ങള്ക്ക് പഴി കേള്ക്കേണ്ടി വരുന്നത് ഡെന്നീസ് ആണ്. എത്ര കയ്പ്പേറിയ അനുഭവം ഉണ്ടായാലും വീണ്ടും വീണ്ടും അതുതന്നെ ആവര്ത്തിക്കും ഡെന്നീസ്.
ഒടുവില്, തന്റെ കമ്പനിയില് ജോലിക്കുവച്ച ഒരു "സ്നേഹിതന്റെ" പെരുമാറ്റദൂഷ്യംകൊണ്ട് തന്റെ ജോലിതന്നെ നഷ്ടമായി. ഇത്രയുംകാലം താന് ആര്ക്കുവേണ്ടി കഷ്ടപ്പെട്ടുവോ അതേ ബോസ് തന്നെ അദ്ദേഹത്തെ ജോലിയില് നിന്നും പിരിച്ചുവിട്ടു. കാരണമോ, "സ്നേഹിതന്" കാരണം കമ്പനിക്ക് നഷ്ടം വന്നുവത്രേ.
നീറുന്ന മനസ്സുമായി ഡെന്നീസ് ആ സ്ഥാപനത്തിന്റെ പടിയിറങ്ങി. ദൂരെ ഒരിടത്തുപോയി ഏകനായി ഇരുന്ന് അല്പനേരം കരഞ്ഞു. ചെയ്തുപോയ "അപരാധം" എന്താണെന്ന് മനസ്സിലാവാതെ ഏറെനേരം അവിടെ ഇരുന്നു. സ്നേഹത്തിനു പ്രതിഫലം കുരിശ് ആണെന്ന് അന്ന് അദ്ദേഹത്തിന് മനസ്സിലായി.
ഡെന്നീസ് എന്ന നല്ല മനുഷ്യന്റെ മുന്നില് ഞാന് ശിരസ്സ് നമിക്കുന്നു. എല്ലാവിധ ഭാവുകങ്ങളും നേരുന്നു.
പോള്സണ് പാവറട്ടി
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ