മലമ്പുഴയിലേക്ക് ഒരു തീര്‍ഥയാത്ര.

ഇത്തവണ ക്രിസ്തുമസിനു  ഞാന്‍ നാട്ടില്‍ പോയപ്പോള്‍ കുടുംബസമേതം ഒരുകൊച്ചു തീര്‍ഥയാത്ര നടത്തി. പാലക്കാട്‌ മലമ്പുഴയിലെ പരിശുദ്ധ കന്യകാമാതാവിന്റെ നാമധേയത്തിലുള്ള ഒരു കൊച്ചു  ദേവാലയത്തിലേക്കാണ് പോയത്.  ആ ദേവാലയത്തിലെ വികാരി ഫാദര്‍ ജോണ്‍ മരിയ വിയാനി ആ കൊച്ചു ദേവാലയത്തെക്കുറിച്ചും അവിടെ നടന്നുകൊണ്ടിരിക്കുന്ന അത്ഭുതങ്ങളെക്കുറിച്ചും വളരെ വിശദമായിത്തന്നെ ഞങ്ങളോട് വിവരിച്ചുതന്നു. ആ വൈദികന്‍ കഴിഞ്ഞ പതിനഞ്ചു വര്‍ഷമായി അവിടെ സേവനം ചെയ്തുകൊണ്ടിരിക്കുകയാണ്.

ഇപ്പോള്‍ അവിടെ നിലവിലുള്ള ദേവാലയം ഏതാണ്ട് 28 വര്‍ഷങ്ങള്‍ക്കു മുന്‍പ് അവിടത്തെ ജനങ്ങള്‍ക്ക്‌ പാല്‍പ്പൊടിയും മറ്റും വിതരണം ചെയ്തിരുന്ന ഒരു ഷെഡ്‌ ആണത്രേ. തികച്ച് 50 പേര്‍ക്കുപോലും നില്‍ക്കാന്‍ കഴിയാത്ത അത്ര ചെറിയ ഒരു ഷെഡ്‌., അതാണ്‌ പിന്നീട് ദേവാലയമായി മാറ്റിയത്. സ്ഥലസൗകര്യം കുറവായതിനാല്‍ ഇപ്പോള്‍ അതിന്റെ അടുത്ത് പുതിയൊരു ദേവാലയം പണിയുന്നുണ്ട്.

ഈ കൊച്ചു ദേവാലയത്തിലെ മാതാവിന്റെ അത്ഭുത തിരുസ്വരൂപത്തെ തൊട്ടു വണങ്ങുന്നവര്‍ക്ക് ഒത്തിരി അനുഗ്രഹങ്ങള്‍ കിട്ടുന്നുണ്ട്‌ എന്നാണു അറിയാന്‍ കഴിഞ്ഞത്. വിവാഹ തടസ്സം മാറിക്കിട്ടുന്നതിനും കുഞ്ഞുമക്കള്‍ ഉണ്ടാകാനും ജോലി ലഭിക്കാനും മറ്റും മറ്റുമായി ഒത്തിരിപേര്‍ വളരെ അകലെനിന്നുപോലും അവിടേക്ക് എത്തുന്നുണ്ട് എന്നാണ് അറിഞ്ഞത്.

ആ ദേവാലയത്തില്‍ കുറച്ചുനേരം മുട്ടുകുത്തി പ്രാര്‍ഥിച്ചപ്പോള്‍ ഞങ്ങള്‍ക്കും മനസ്സിന് ഒത്തിരി സന്തോഷവും സമാധാനവും ലഭിച്ചു. പുതിയ ദേവാലയത്തിന്റെ നിര്‍മ്മാണത്തിന് എന്നെക്കൊണ്ട് കഴിയുന്ന സഹായവും കൊടുത്തുകൊണ്ട് ഞങ്ങള്‍ മടങ്ങി.

ആര്‍ക്കെങ്കിലും ആ കൊച്ചു ദേവാലയത്തിലേക്ക് പോകണമെന്നുണ്ടെങ്കില്‍, അവിടത്തെ വികാരിയച്ചനെ ബന്ധപ്പെടണം എന്നുണ്ടെങ്കില്‍ അച്ചന്റെ ഫോണ്‍ നമ്പര്‍ താഴെ കുറിക്കുന്നു.

Rev.Fr.John Maria Viani: 0091 9020098498   /    0091 491 2815665